Група "ФЭСТ"
Прислал admin 20.02.2010 01:26
Народны гурт вандроўных музыкаў “ФЭСТ”


Гурт “Фэст” пачаў сваю творчую дзейнасць са снежня 1992 года. Яго рэпертуар вельмі разнастайны – вялікая колькасць беларускіх народных песень, танцаў, розных баек і прыпевак. Музыкі з задавальненнем выконваюць і творы іншых народаў свету. Галоўнае месца ў творчасці гурта займаюць песні яго ўдзельніка Міхася Скрундзя, творы якога выконваюць як самадзейныя, так і прафесійныя музычныя калектывы нашай краіны і замежжа. Яго песня “Братка- беларус” адна з найбольш папулярных сярод напісаных у апошнія гады самадзейнымі кампазітарамі.

Ад самага пачатку сваёй дзейнасці калектыў паставіў перад сабой мэту адраджэння старажытных культурных традыцый, прапаганду беларускай песні, танца, гумару. Нездарма і назва ансамбля – гурт вандроўных музыкаў “Фэст” (з лацінскай мовы “свята”). У 16-17 стагоддзях на Беларусі вандроўныя музыкі хадзілі па вёсках і гарадах, дарылі людзям радасць народнай музыкі і слова.

У 1994 годзе гурт “Фэст” быў запрошаны на Першы Міжнародны фестываль фальклору ў Пінск, за удзел у якім ансамблю нададзена ганаровае званне народны. З гэтага часу музыкі бяруць удзел практычна ў кожным вялікім свяце, становяцца лаўрэатамі і дыпламантамі шматлікіх конкурсаў і фестываляў.

Канцэртная дзейнасць “Фэста” вельмі шырокая: ад канцэртаў у сваёй краіне, выступаў у працоўных калектывах, навучальных установах, на святах, да гастроляў у далёкім замежжы. “Фэст” любяць і чакаюць слухачы розных узростаў, прафесій, нацыянальнасцяў.

“Фэст” – самабытны ансамбль са своеасаблівай манерай ігры на народных інструментах. Веданне жанра народнай музыкі і песні, тэмбравых асаблівасцяў інструментаў кіраўніка гурта Івана Кусцінскага і яго ўдзельнікаў даюць магчымасць, пры граматна зробленай партытуры, дасягнуць ідэальнага гучання. Кожны музыка адчувае сваю адказнасць і валодае пачуццём калектыўнай творчасці. “Фэст” з’яўляецца ўзорам стылю выканання і аранжыроўкі.

Баранавічы па праву ганарыцца сваім славутым народным гуртом вандроўных музыкаў “Фэст”.

Удзельнікі народнага гурта вандроўных музыкаў “ФЭСТ”

1. Кусцінскі Іван Аляксеевіч – кіраўнік, гармонь, баян, гітара, вакал.
2. Скрундзь Міхась Валянцінавіч – паэт, кампазітар, вакал.
3. Ляшкевіч Сяргей Мікалаевіч – скрыпка.
4. Пятліцкая Алёна Ігараўна – цымбалы.
5. Дунчык Аляксандр Аляксеевіч – дудка, кларнет, жалейка.
6. Хаміцкі Андрэй Ігаравіч – вакал, барабан.
7. Белавусаў Георгій Дзмітрыевіч – труба, барабан.
8. Стэцко Генадзь Васільевіч – вакал, кантрабас.

Глядзiце таксама здымкi ў раздзеле "Культура"
Слухайце таксама творы ў раздзеле "Песни"

Выкарыстаны матэрыялы сайта tvory.byhost.org